網路小說 《Recall》回溯 第六章 整蠱計劃
《Recall》回溯 第六章 整蠱計劃
伊凡興沖沖地衝回公司，阿堅和阿強早已在公司門前守候，三人相視而笑，心中所想都是同一件事情，到底是否真的如他們所願，中了六合彩呢？
伊凡帶著招積的表情，從口袋中掏出那張經歷千辛萬苦，萬佛朝宗，回到過去才買得到的那注六合彩獎券，攤在桌上，而阿堅亦經已準備好手機連上馬會網站，三人準備一起對獎。
「阿強嘅建議真係好得，我尋晚發夢返返去投注站，六個號碼全部唔記得哂，好彩阿強你教我要用口訣記憶，我打哂座咁先諗返起嗰啲數字。」在伊凡不斷讚賞阿強高深智慧的同時，阿堅已經迫不及待地開始對著獎券上的號碼，可是在阿堅的臉上，並不是一個因為中獎而興奮的神情。
「阿煩，點解你張飛一個字都唔中嘅？」阿堅疑惑地看著伊凡。
「唔中？！冇理由！」伊凡一手搶過獎券，唸著上方的數字，「1，8，21，27，33，42，冇錯呀，我尋日係買呢幾個號碼呀，點會唔中？」
阿堅把手機上的開彩結果秀給伊凡看，上面顯示的結果與伊凡獎劵上的數字無一相同。
「期數冇買錯，但號碼就完全唔同，係唔係你發夢嗰時冇改變到過去呢？」阿強詢問。
「唔會，我好肯定發夢返返過去，呢六個號碼都係喺夢入面買的，和最初買嘅都唔一樣。」伊凡氣得跺著腳回答。
「一定係阿煩你去左另一個平行宇宙，買嘅係另一個宇宙嘅六合彩，唔係嘅話點解釋到啲號碼錯哂呢，一定係，除非唔係！」阿堅突發其想，連他都要用啲宇宙科幻的概念去解釋伊凡今次沒中六合彩的原因，他接著說：「我有看過芒果動新聞呀，平行宇宙呢，係嗰個…...Ste…Ste乜話，冇錯喇，係Steve Jobs講架嘛！嗱，我都識架！」
「老友，係Stephen Hawking講既，即係霍金呀。Steve Jobs係做你手上嗰部野嘅嗰條友。」阿強額角冒出三條黑線，不知道該好嬲還是好笑。「阿凡你尋日睇完攪珠，有冇抄低嗰六個號碼？」
「有呀，當然有。但係噚日夢境入面，我搵唔到張紙條，我估係嗰個時間，張紙條仲未出現。」伊凡冷靜地回答，接著從口袋中拿出那張記載著昨晚攪珠結果的小抄。
神奇的事發生了，伊凡打開小抄，上面寫著六個號碼，而該六個號碼正正與開獎的六個號碼完全吻合！
「哇！發生咩事？！點解啲號碼唔同咗嘅？」伊凡驚訝地嚷著。
「妖，煩哥，你尋晚照住佢黎買，咪中頭獎囉，係咪揸流攤呀你。」阿堅嘟著嘴在抱怨。
「唔係，事情冇咁簡單。」阿強若有所思地說。「這張紙條正正解釋咗目前既奇怪情況。如果阿凡係帶住呢六個數字去咗平行宇宙，理論上我地而家身處既時空，呢張獎卷，呢個攪珠結果都唔會變；而現在張獎劵嘅號碼同一開始唔同，紙條嘅結果係攪珠後抄既，亦與開彩結果吻合，代表阿凡一直處於同一個時空，回到過去嗰陣連開彩結果都重置埋，所以阿凡抄嘅係改變後嘅結果。簡單嚟講，如果阿凡真係回到過去改變左某啲野，時空就會重新洗牌，攪珠係一個亂數運動，即係代表重新攪珠嘅結果都唔會相同，結論，呢個係「蝴蝶效應」嘅結果。」
「即係就算我可以回到過去，都唔可能中六合彩？」伊凡失望地問。
「冇錯，正是如此！或者我地應該搵下第二啲方法。」阿強肯定地回答。
正當三人都為中不了六合彩而沮喪著，某人在他們身後大搖大擺地走過。「喂！強，堅，凡」沒錯，正是第一章所提及的世紀賤精David哥。「三條磨碌喺度靜雞雞密謀啲乜野呀？係咪傾緊要搞九邊個女同事咁呀，死鹹濕仔，好心你地就正正經經比錢去馬啦，不過睇落你地個個污糟邋遢冇嚟貴格，都唔方有錢搵女架喇，去砵蘭街搵啲阿嬸驅驅風把啦，冇改錯名架你地。」David說完就揚長而去，有這傢伙出現的地方，真是沒有一句好聽的說話能入耳。
三子怒目瞪視著David，由其是阿強，能感受到他頭頂都已經火冒三丈了。皆因阿強和David本身就有「牙齒印」，話說當年阿強在David手下做事，兩人正在準備一則企劃案，客人需要報價單，David不知在忙甚麼，隨手就胡亂批了一些價錢讓阿強去做報價文件，結果價錢與條款都錯了到簽定合約時才發現，最後和客戶大炒一輪，不歡而散。而David想當然也不會護著阿強，整塊黑鍋完整地塞進阿強嘴巴，還主動給阿強出警告信，阿強因為此事不爽了整整一年。所以每次當阿強碰到這個賤精，都會用殺父仇人的眼光瞪著他。
「你條仆街皇馬褂，比我搵到機會，我實搞死你！」阿強咬牙切齒地說，看著阿堅和伊凡二人，二人異口同聲地說：「強哥，兄弟願意兩脇插刀，水裡水裡去，火裡火裡去。」說著便一手指著天，另一手指著地，十分灰諧。
眼角瞄到Connie走過，阿強的嘴角露出一絲要不得的奸笑，狐狸尾巴一動，心裡崩出了一條詭計。「兄弟，我始乎諗到要點樣對付條賤精，不過喺呢樣野之前，我想你地幫手去確定一件事。我呢幾日留意到肥婆一到中午時間，就望住自己部電腦，陰陰嘴，細聲講大聲笑，有時仲要笑得幾淫賤下，平時兇神惡煞嘅佢，會咁樣笑法，其中必定有內情，我要想辦法調查一下。」伊凡聽完想了一想，覺得自己的超能力能幫忙阿強，於是便自告奮勇地說調查的事情就包在他身上。
說是包在他身上，其實伊凡是打算好好利用其夢境回溯的能力，去作出這次犧牲任務。當天中午，三人躲在角落偷偷觀察著Connie，伺機而動，當她回到座位打開電腦，果然如阿強口中所述，肥婆開始竊竊淫笑，左手也伸進枱底下不知道在摸甚麼。突然阿堅在公司門外大叫：「老闆你返來嗱？老闆今日工作辛苦喇！Connie姐，老闆搵你呀，快啲嚟啦！！」Connie聞訊即時跑到門口，伊凡見機立即以低姿態，用烏龜爬爬般姿勢竄到Connie的座位上，打開她的電腦，接下來的畫面幾乎震瞎伊凡雙眼，映入眼簾的竟然是一個約會交友網站，另一個視窗則打開了一些赤棵上身的大胸肌肉男照片，按了幾下，竟然發現David哥在公司的日常照！「不得了，不得了，比肥婆發現我知道佢呢個秘密實比佢滅口都得喇，趕緊撇！」說時遲那時快，Connie早已經站在林伊凡的身後，目露凶光，雙手已經做出要勒死他的手勢；原來Connie一離開座位沒多久，就想起自己電腦沒鎖上，於是趕緊回來鎖機，方發現林伊凡竟然在偷看她的電腦，我絕對相信Connie當時應該有一絲衝動要殺人滅口。
伊凡感到背後醞釀著一陣殺意，不用回頭也能知道肥婆Connie已經站在身後，「林……伊......凡！」未待伊凡轉頭，Connie經已手起刀落，一巴掌車過去了。
準備遭受重擊的伊凡不作任何反抗，因為他明白這將會是最好時機，只要一被打暈，就能回溯過去。一世厄運的伊凡，今次就走足狗屎運了，肥婆掌力未到，伊凡已經被掌風給嚇昏過去。
「衰男人，老闆明明今日就出差，點會無啦啦返嚟。」時間回溯到伊凡偷看Connie電腦之前，Connie來到門口發現只是阿堅開的無聊玩笑，怒氣衝衝的走回自己的座位繼續享受她的「私人胸間」，殊不知自己的私密已經被伊凡看光光。
伊凡立刻會合阿堅阿強，急不及待要向他們報告這個驚世的調查結果。阿強臉上露出得戚自信的神情，說：「哼哼，果然不出我所料，早排我已經留意到肥婆成日望住賤精David陰陰嘴笑，只係估唔到原來佢仲有上約會網站，仲要睇埋啲咸野，睇嚟我地要為佢準備一份「豐盛又多汁嘅晚餐」，嗱，我地咁咁咁做，然後….」。
「軍師妙計呀！」阿堅和伊凡不約而同地說。
阿堅打開Whatsapp，給David傳了一張不知名的性感美女照片，加上一句「HJ2Q，X州都損」，再立即補上「Sorry, Wrong
msg!」，完美地假裝是錯傳了訊息，立即補救的樣子。David不疑有詐，讀了這個訊息後立刻兩眼發光，衝到阿堅面前，用手臂摟著阿堅的脖子，手機開著Whatsapp，笑淫淫質問阿堅為何傳這樣的訊息給他，阿堅裝作尷尬又害怕地說：「David哥，我真係冇心嘅，我係諗住傳比阿強，點知傳錯左，你大人有大量當睇唔到好冇？」
「哈哈，點可以當睇唔到，條女咁索，你試過未先？想我David哥大人有大量原諒你呢，就嗱嗱淋介紹比我識，唔係我就放上Facebook，爆你啲衰野，知道未！」David哥說著一手捏著阿堅的脖子，另一隻手就摸著阿堅的屁股，阿堅雖感受辱，但心裡明白David已經跌入圈套，喜從中來。過了沒幾分鐘，阿堅回覆說經已為David安排好酒店。
另一邊廂，伊凡趁Connie沒注意，塞了一封情書在她枱頭，信上面寫著：
親愛的陳小姐：
妳是我的靈魂，妳是我的生命，望與卿一聚，今晚君悅酒店，不見不散！
愛慕妳的人 D.
第七章 待續
https://www.facebook.com/ivanhasfun/posts/2420108771547112
前文回顧
第三章 愛心杯
第四章 綺夢
第五章 發達大夢
留言
發佈留言